Таулада хал - дайым контрольдады

Таулада кёп жерледе къар жаугъаны сайын аслам жыйылгъанлай турады, ол энишге юзюлюп тюшер къоркъуу да сакъланады. Бизде бюгюнлюкде эсепде аллай 132 тийре барды. Аладан эм къоркъуулугъа Элбрусда «Азау», Чегет» эм «Уллу Гара-Суула» саналадыла. Ала бла бирге районда аллай 35 жер барды.
Нейтринодан Адыл-Суугъа дери созулгъан быллай тийреге Элбрусда лавиналагъа къажау сауутланнган къауум (ЭВПЛО) жууаплыды. Ала къырал магъаналы экономика объектлеге хата жетмезча кёз-къулакъ боладыла.
Тау тёппеледе жыйылгъан къарны тюшюрюрча топла сегиз жерде орнатылыпдыла. Аланы санында 12 зенит сауут, 4 топ эмда бир «Нурис» комплекс барды. Болумгъа 3040 эм 2125 метрде орналгъан «Чегет» эм «Терс-Къол» метеостанциялада суткагъа сегиз кере контроль бардырадыла, хауа бузулса уа, ол хар сагъатдан этиледи. Былтыр ЭВПЛО топ бла атып къарны 54 кере тюшюргендиле.
Бюгюнлюкде таулада 2500 метр бийикликде къар юзюлюрге къоркъуу жокъду. Ол санда Азауда 1,5 метр чакълы къалынлыгъы болгъан къарны тыярча инженер  комплекс ишленнгенди.  Аны себепден мында топла хайырланыр кереклиси хазна жокъду.
 

 

Курданланы Сулейман.

Свежие номера газет Заман


11.06.2019
10.06.2019
07.06.2019
06.06.2019