Айырмалы спортчулагъа – кубокла, майдалла, дипломла

Россейни Олимпиада комитети 10 февральда къыралны битеу регионларында Спортну къыш тюрлюлерини кюнюн белгилегенди. Ол байрам  Сочиде  ХХII Олимпиада эмда ХI Паралимпиада къыш оюнланы 5-жыллыгъына аталып бардырылгъанды.
Къабарты-Малкъарда да Элбрусну этеклеринде ол кюннге жораланып жашланы бла къызланы араларында тау бийикледе  лыжала бла учуудан эришиуле бардырылгъандыла. Алагъа къараргъа келген сыйлы къонакъланы араларында Россей Федерацияны Президентини Шимал-Кавказ федерал округда толу эркинликли келечиси Александр Матовников да болгъанды.
Хорлагъанланы уа къырал башчыны СКФО-да келечиси бла КъМР-ни Башчысыны къуллугъун болжаллы халда толтургъан Казбек Коков саугъалагъандыла. Бек иги спортчулагъа кубокла, майдалла, дипломла эмда тау лыжалада учарча керекле да берилгендиле.