Къайры барсам, къайда болсам да, фотоаппаратым биргемеди

Мен малкъар тилде чыкъгъан газетибизде ишлегенли быйыл 50 жыл болады. Анча заманны ичинде тюрлю-тюрлю адамланы юслеринден кёп материал басмалагъанма. Алай артда уа сурат да алып башлагъанма.  Бусагъатда  архивимде ала 200 мингден асламдыла.
Айхай да, суратха тюшюрген адамларымы бир-бирлери дунияларын алышхандыла, башхалары арабызда сау-саламат жашайдыла, ючюнчюлери уа уллайгъандыла. Аны не ючюн айтама, сурат озгъан такъыйкъаланы сау этеди, адамланы, ол неда башха белгили кюнлени эсге тюшюртеди.
Белгили французлу  сурат алыучу Анри Картье-Брессонну бир иши мени не заманда да кёз аллымдады. Шинтикде къарт къатынчыкъ олтурады. Кёзлери,  къайры эсе да узакъгъа къарайдыла.
Жауунчукъ  шулпу этеди. Ол а аны эслемейди. Башында уа къалпагъындан тышында дагъыда бир зат кийип, аякъларын да клеёнка бла чулгъап. Баям, ол иги кесек замандан бери олтурады алай. Аны къатында бош тургъан шинтикле бардыла. Алада къачан эсе да бирде аны жууукълары, ахлулары олтургъандыла. Ала  кетгендиле, жокъдула…
Бу суратха къарай, ол  жангызлыкъны белгиси болгъанын сезесе. Уллайгъанладан кёплеге сынаргъа тюшеди  аны. Ол къадарды, жашауду. Бу сыфатны кёрген ким болса да, жюреги къозгъалмай къаллыкъ тюйюлдю. Къаллай уллу усталыкъ керекди, чыгъарма ма аллай сезимле туудурурча! Ма андады аны магъанасы.    
Мен къыркъ жыл мындан алгъа  кесиме деп алдырып башлагъанма суратны. Биринчим а бюгюн да  юйде сакъланады. Андан сора тюшюргенлериме да къарай кетсем, кёп зат кёз аллыма келип къалады. Сёз ючюн, тенг къызларым бла  Кубагъа  баргъан кезиуюмю айтсам да, тамам сунама. Бу таурухлу айрыкамда  хар атламыбызны суратха тюшюрюрге кюрешгенме. Ала, бусагъатдача, тюрсюнлю тюйюлдюле, алай бек хычыуун кёрюнедиле.
 Арт жыйырма жылда уа къайры барсам, къайда болсам да, фотоаппаратым биргемеди. Аны алай болургъа кереклисине республикада белгили актёр эм суратчы Шахмырзаланы Алексейни биринчи дерсинде тюшюннгенме. "Жукълагъан заманынгда да, аппаратынг биргенге болсун", - деген эди ол. Аз-аздан  сынам жыйышдыра барама да,  кюнлени биринде газетни баш  редактору Атталаны Жамал чакъырып: «Суратчыбыз жокъду,  ол ишни къолгъа алсанг, ыразы боллукъма», - дейди.
Алай бла, республикада болгъан ишлени, байрамланы, тюбешиулени, белгили инсанларыбызны, спортчуларыбызны, къурулушчуларыбызны, врачларыбызны, устазларыбызны, табийгъатны, жаныуарланы да суратха тюшюреме. Республикада мени аягъым басмагъан хазна эл, шахар, район да къалмагъанды!
Бусагъатда алгъынча тюйюлдю, сурат алыуну не къыйынлыгъы барды, дегенле да бардыла.  Хау, цифралы техника бу жумушну женгилирек этеди, алай, ийнаныгъыз сиз манга, сыфатны качествосуну  50 проценти аны алдыргъанны чемерлигине кёре болады. Редакцияда ишлеген къадарымда  мен кёп уста бла танышханма, сёлешгенме. Аланы оюмлары да ма алайды.

Холаланы Марзият.

Свежие номера газет Заман


08.07.2020
06.07.2020
03.07.2020
02.07.2020