Печатная версия газеты "Заман" на портале СМИ КБР

Бу кюнледе Минги тауну этегинде скайраннингден RedFox Elbrus Race  халкъла аралы 10-чу юбилей фестиваль бардырылады. Анга къатышыргъа Бахсан ауузуна 22 къыралдан 450 альпинист келгенди. Эсигизге салайыкъ, эришиуню RedFox компания къурагъанды.

РФ-ни къурулуш эм ЖКХ министри Михаил Мень бу кюнледе Москвада жашау журтла-коммунал мюлкню эм шахарланы тийрелерин айнытыу бла байламлы битеуроссей кенгеш бардыргъанды. Аны ишине КъМР-ни къурулуш, ЖКХ эмда жол мюлк министри Вячеслав Кунижев да къатышхан эди.

Ючюнчю майда Тёбен Чегемде бла Чегем чучхурланы къатында Малкъар халкъны къыраллыгъы къайтарылгъан кюнюне атап,уллу байрам болгъанды. Анга Тёбен Чегемни администрациясыны башчысы Къонакъланы Илияс,   эллиле, къонакъла да къатышхандыла.Ол кюн къарындаш миллетни алгъышларгъа Лячинкъая элни администрациясыны келечилери, акъсакъаллары да келгендиле.   

3 майда  Абхазия майданда  малкъар  халкъ кёчгюнчюлюкден  туугъан жерине къайтханына  жораланнган уллу концерт болгъанды. Аны Нальчик шахарны жер-жерли администрациясыны культура управлениясы «Эльбрусоид» ара бла бирге къурагъандыла. Анга келгенлени Къулийланы Къайсын атлы малкъар къырал драма театрны артисти  Мызыланы Аубекир бла  актриса  Лина Мафедзова алгъышлагъандыла.

РФ-ни Къырал Думасыны депутаты Геккиланы Заур «Единая Россия» партияны регион жамауат приёмныйинде бир къауум адамгъа тюбеп, аланы  жарсыуларына бла тилеклерине тынгылагъанды. Ала уа социал жалчытыу, иш тапмау, жашар жерни къытлыгъы, окъуу бла да байламлы эдиле. Битеу да 14 обращениягъа къаралгъанды.

Бу къыш тырныауузчу Аппайланы Хызыр Волгоградны «Ротор» командасы бла келишим тауусханды. Футболну миллет лигасыны жазгъы кезиуюнде бу клуб турнир таблицаны ахырында тизмеледе эди. Алай бусагъатда ол иги да ёргерекге кётюрюлгенди эм, баям, биринчи лигада жерин сакъларыкъгъа ушайды. 

Пятигорск шахарны каратеден ачыкъ биринчилигине Шимал Кавказны республикаларындан бла Краснодар крайдан 370-ге жууукъ спортчу къатышхандыла. Аланы араларында Элбрус районну олимпиада резервли сабий-жаш тёлю спорт школунда жарау этгенле да болгъандыла эм ала сегиз майдал къытхандыла. 

Гуманитар тинтиуле бардыргъан институтда алгъаракъда «Вопросы системного изучения словесного искусства» деген ат бла озгъан Битеуроссей даражалы конференция КъМР-ни  халкъ артисти Зарамук Кардангушевни 100-жыллыгъына жораланнганды. Аны къураугъа сагъынылгъан махкемени администрациясы, адыг фольклорну секторуну алимлери къыйын салгъандыла. 

Хар инсанны да акъылына келе болур, жашай баргъанда не зат сакълайды бизни деген соруу. Дуния къаллай чекге жетерикди,  аны бла бирге бизни шахарларыбыз, эллерибиз къалай тюрленирик болурла? Хар бирибизни да ата-бабаларыбыз элден чыкъгъандыла. Таулуну ол – туугъан жериди, жырларыды, таурухларыды, ана тилиди.

Азретали Куготов, 1975 жылда КъМКъУ-ну эл мюлк факультетини ветеринария бёлюмюнде окъуп бошагъанындан сора, направление бла Прохладна районда Петровла атлы колхозгъа ишлерге барады. Ол кезиуледе бу мюлк республикада бек уллуладан бирине санала эди.